Zeta Aromátiko di Yerba di Hole/Basil
Nos a lanta konose uso di yerba di hole komo remedi na momento di ferkòut of grip. Hopi di nos por kòrda kuantu biaha nos mayornan i welanan a laga nos drumi ku blachi di yerba di hole meskla den zeta di koko bou di nos pia pa baha keintura.
Internashonal, yerba di hole ta konosí komo ‘Basil’ of ‘Sweet Basil’. Su nomber Latin ta ‘Ocimum basilicum’.
E benefisio di yerba di hole ta inkluí e abilidat pa trata mareo, indigestion, konstipashon, problema respiratorio i diabetis. Yerba di hole ta un bon fuente di vitamina A, magnesia, kalsio, potasio i heru.
E blachi i flornan di e yerba di hole ta e partinan importante ku ta wòrdu usa komo remedi. Aparte di medisina ront mundu riba un base regular nan ta wòrdu agrega den kuminda i resetanan. E zeta di yerba di hole ta masha popular na Oropa, Asia Central i Sur i India. Den e region Mediteraneo i resetanan Italiano, e zeta ta bastante usa.
Den e mundu di aromaterapia e zeta ta wòrdu usa mirando ku e aktivá e mente pa por tin klaridat di pensamentu, stabilisá nervionan, mientras e ta aliviá kongestion di sinus, baha keintura, trata problemanan ku menstruashon.
Algun di e benefisionan terapeutiko di e zeta di yerba di hole ta ku e ta un analgésiko, evitá kramp, antidepreshon, digestion, saka slèim, tóniko, stimulante i insektisida.
Uso terapeutiko
Kosmétika
Zeta di yerba di hole por wòrdu apliká topikal of komo parti di un zeta pa masashi riba bo kurpa. E ta duna tantu kueru komo kabei seku un brio bunita. Tambe e ta hopi usá pa trata acne i ekzema debí ku e ta antibakteria i antiséptiko.
Digestion
E zeta tambe sa wòrdu usa komo un tóniko digestivo, mirando su benefisio di ta aliviá indigestion, konstipashon i kramp den stoma. E ta trese un alivio inmediato pa ku gas den stoma i tripa.
Fèrkout of Grip
Zeta di yerba di hole ta masha bon pa trata fèrkout i grip spesial na momento ku tin keintura. Mirando su benefisio ‘antispasmodic’, e zeta ta hopi usa pa saka slèim. Esaki ta hasi’e ideal pa meskla e zeta di yerba di hole huntu ku tea tree pa asina saka slèim.
Respiratorio
Banda ku e zeta di yerba di hole ta bon pa saka slèim, tambe e ta bon pa personanan ku ta sufri di astma, brònkitis i infekshon di sinus. Na momento ku usa e zeta den un diffuser of oilburner, esaki ta sprèit den hinter e airu den kamber of kas anto dor di inhala e holo esaki ta yuda aliviá i restringí e síntomanan ku problema respiratorio.
Infekshon
Infekshon pa medio di kortá, herida, infekshon di kueru, infekshon na blas di urina por ser tratá ku e zeta di yerba hole dor di su benefisio antibakteria. Tambe e ta bon kontra di infekshonnan viral ku ta ataká nos kurpa of drenta nos kurpa pa medio di un herida. Pa por trata kortanan chikitu por apliká un of dos dròp di e zeta direktamente riba e herida of meskla esaki den un zeta básiko i hunta riba e herida. No solamente e ta kura lihe pero e ta bringa kontra bakteria i evitá infekshon.
Strès
E zeta tin un efekto masha refreskante na momento ku hole of konsumí esaki. Pa e motibu aki e ta wòrdu apliká durante tratamentu di tenshon nervioso, kansansio mental, melankolia, migrania i depreshon.
Doló
Zeta di basil ta un analgésiko i ta aliviá doló. Bon pa trata artrítis, herida, kemadura, doló di kabes, versuek.
Mirando ku zeta di basil ta ‘antispamodic’, e ta wòrdu usa den un komprès kayente pa alivio di dolo di kramp durante di menstruashon i konstipashon kroniko. Tambe por wordu aplika na momento ku tin dolo di muskulo i skarnir. Hopi biaha e zeta aki no ta wòrdu usa su so sino e ta agregá na un meskla ku otro zetanan ku tin benefisionan similar.
Koutela i Kontra indikashon
Maske ku e zeta di yerba di hole/basil tin masha benefisio, tog mester trata ku koutela. Hende muhe na estado no rekomendá pa usa e zeta aki mirando ku e ta promove menstruashon. Tambe e no ta bon pa usa ku muchanan bou di 16 aña. Mamanan ku ta duna pechu no mester di use dor ku e por tin efekto riba mama i yu. Na momento di uso apliká un montante masha chiki i miho ta pa meskla esaki ku zeta básiko manera un zeta di almendra.
Recent Comments