January 2018

Alivio di sangura ku aromaterápia

Na momento ku awa kumisa kai hopi mesora sanguranan ta kumisa fiesta. Pero kiko mester hasi si bo kura di kas ta limpi pero tog nos ta wòrdu ataka dor di sanguranan? Den un kaso asina nos mester kuminsá pensa riba prevenshon i kiko ta bai hasi na momento ku nos wòrdu pika pa sangura.

Prevenshon

Prevení ta miho ku kura. Esaki ta sigur ora nos ta referi na e atakenan ku nos ta risibiendo e dianan aki serka sangura. En general lamungras of citronella ta tene insektonan leu, usando e métodonan manera un kòmchi ku awa kayente of un sprei. Pa prevení ku sangura ta pega na nos kurpa, en general zeta di lavender ta un bon opshon. Si bo tin un boter di sprei, use pa disolvé lamungras den awa i sprei ront den kas. Si bo tin awa kayente den baño, yena bo badkùip ku awa i dròp algun dròp di lamungras den dje si ta bai sali kas anochi i laga e stom zueif den airu drenta bo kamber. Un otro alternativa, yena kualke kòmchi ku awa kayente, pone algun dròp di e zeta aromátiko i pone esaki serka di porta i bentana pa evitá ku e bishitantenan no deseá aki ta drenta bo kas. Huntu ku e lamungras tambe por usa lavender i/of pepermùnt.

Traha un meskla di lavender, lamungras i pepermùnt ku por wòrdu usa diferente manera. Anochi of si bo ta tuma un siesta, pone 2 dròp di zeta aromátiko riba un pida katuna of tiesu i laga esaki serka di bo kama. Tene na kuenta ku si bo tin mucha chikitu ku ta drumi den bo kamber pa no pone esaki muchu serka di su kabes. Anochi ta ora pa sanguranan fiesta i práktikamente tur zeta aromátiko por wòrdu usa kontra di nan, pero lavender i lamungras ta miho.

Tambe por hasi uso di un zeta pa masashi pa mantené sangura leu. Traha un meskla di e tres zetanan ariba menshoná i disolvé 2 dròp di e meskla den 2 telep di e zeta pa masashi pa hunta riba bo kurpa of simpel agregá esaki na bo loshon of krema. Si ta sali anochi, hunta un tiki di e zeta pa masashi riba bo kurpa, anto si akaso bo di antemano bo sa kubo ta víktima di sangura, meskla for di trempan 30 dròp di lavender den 2 kuchara grandi di zeta básiko vegetal anto hunta esaki riba e parti di kurpa ku ta keda eksponé. Esaki tambe por wòrdu hasi anochi promé ku drumi pa protekshon durante ku bo ta drumi.

Nos ènkelnan ta e aria ku mas frekuente ta wòrdu ataká pa sangura. Tapa e ènkelnan dor di bisti meanan di katuna ta simpel i masha efektivo anto pa bo ta sigur ku bo pianan ta wòrdu protegá, pone un dròp di zeta di lavender of lamungras riba e parti ariba di bo mea.

Banda ku ta usa lavender, lamungras tambe por wòrdu usa riba nos kurpa pero dor ku e por tin efekto iritante nunka no pone puru riba e kurpa. Semper disolvé den un zeta vegetal promé ku apliká esaki riba bo kurpa. Pero esaki ta e kaso ku mayoria zeta aromátiko dor ku nan ta hopi sterki.

Un manera mas efektivo ta pa hasi esaki pa medio di un loshon natural, ‘natural lotion bar’. E loshon natural aki ta traha abase di was di abeha, shea i cocoa butter huntu ku zeta di almendra. Lamungras tin mes un efektivo ku lavender pa tene sangura leu. Mas ahinda un di su karakterístikanan ta pa kore ku insekto. E loshon natural, ‘natural lotion bar’, ta bini ku sea aroma di lamungras huntu ku pepermùnt of lavender huntu ku hasmin. Bo por skohe pa durante dia hunta bo kurpa ku e loshon ku holo di lamungras anto anochi usa esun di lavender, pa aliviá e kueru di pika nan risibí i pa protekshon i ademas e ta yuda bo relahá i disfrutá di un soño saludabel.

Pikanan

Efektonan normal di pika di sangura ta ku e kueru ta hincha, bira korá, i ùitslag pero tambe un reakshon alérgiko por tuma lugá ku por afektá henter e kurpa. Den mayoria kaso bo tin mester di hasi uso di un desinfektante, voral ora ta trata di mucha. Aki nos ta mira ku sin duda prevenshon ta e miho manera pa defendé/protegá nos mes.

Por prepará un desinfektante natural dor di meskla zeta nan di lavender (2 dròp) i eucalyptus (2 dròp) den awa anto usa esaki pa desinfektá kamindanan ku e kurpa a wòrdu pika.

Zetanan aromátiko ta konosí pa nan abilidat pa tene bo safe di pika di insekto i nan ta ingrediente nan aktivo di mayoria produkto renombrá. E mes un bòter chikitu por duna bo protekshon den diferente situashon i si akaso bo wòrdu pika pa un of otro insekto, e zetanan aromátiko por yuda bo dil ku esaki. Spesialmente ora nos tin mucha ta rekomendabel pa nos tin un kit di prome ousilio ku ta kontene zeta nan aromátiko na kas.

Algun otro meskla di zeta di aroma ku tambe ta yuda kontra di sangura ta:

• Eucalyptus huntu ku Lamunchi
• Sweet Basil (Yerba di Hole) ku Lamungras
• Citronella

Loke ku ta pone e sangura nan bai ta ku e holo di nos kurpa ta wordu di ‘mask’ anto esei ta pone ku sangura no ta molestia nos. Por diffuse esaki nan den kas i den kamber.